O contrapoder de Suplusa chega á súa fin

O deputado díscolo Manuel Martínez empregaba a sociedade do solo para facer oposición ao goberno da Deputación – A xustiza anulou de facto esta práctica desleal auspiciada polo Partido Popular

Manuel Martínez (esquerda) e Darío Campos nun pleno anterior | Deputación de Lugo

O pacto entre Manuel Martínez e o Partido Popular topou coa xustiza. O fallo da Audiencia Provincial de Lugo supón de facto a fin do poder da Sociedade Urbanística Provincial de Lugo (Suplusa), ou máis ben do contrapoder exercido dende o ente, encargado –entre outras funcións– de construír e xestionar as residencias da terceira idade na provincia. Este revés xudicial pon freo a unha práctica política que avanzaba dende a deslealdade cara a compra de favores con salarios públicos.

De xeito resumido, a Audiencia Provincial declarou nulas as modificacións realizadas polo Partido Popular nos Estatutos de Suplusa, na xunta xeral do 30 de setembro de 2016. Aquela manobra aproveitara a división do grupo socialista para que o presidente da Deputación, Darío Campos, deixara de ser presidente da sociedade provincial do solo. Os cambios afectaron tanto á composición do consello de Suplusa como á forma de elixir a presidencia do ente.

Un ano máis tarde, a reconciliación entre Manuel Martínez e o Partido Socialista fixo que o alcalde de Becerreá acadara a vicepresidencia da Deputación e a presidencia de Suplusa. Esta situación, con todo, non duraría moito. Os reiterados enfrontamentos co grupo dos socialistas levaron a Martínez a facer oposición interna, votando a favor da reprobación de Darío Campos e recuperando as competencias de apertura de residencias para Suplusa. Todo, coa participación necesaria do Partido Popular.

Manuel Martínez, alcalde de Becerreá, é deputado non adscrito e concorrerá nun partido independente aos próximos comicios

Por mor deste comportamento, o PSdeG suspendeuno de militancia cautelarmente, e foi apartado da vicepresidencia e a xestión territorial o pasado 11 de abril. A situación límite produciuse a finais de maio, logo de que Martínez e os populares chegaran a un acordo polo que pasaría a cobrar 57.000 euros anuais coma presidente de Suplusa, cando nunca existiu retribución polo posto. Nese acordo tamén estaba contemplada a contratación dun asesor por outros 41.000 euros. En resposta, o voceiro dos socialistas presentou unha moción de urxencia para a disolución do ente.

Dado que só o pleno pode retirar os medios propios á sociedade urbanística, a perspectiva do goberno provincial semellaba pouco alentadora: con Manuel Martínez coma deputado non adscrito, os socialistas contan con dez deputados e os nacionalistas con dous, fronte aos doce do grupo popular. Xa na sesión plenaria, a expulsión do belixerante deputado díscolo permitía a aprobación da moción urxente, polo voto de calidade do presidente Darío Campos; mais os populares deixaron o salón de plenos antes da votación, de xeito que non houbo quorum.

A situación de empate semellaba ir para longo, de novo cos secretarios da Deputación e de Suplusa alimentando a guerra de informes sobre as potestades das dúas entidades. Martínez mantiña a axenda de inauguracións mentres a Deputación pedía a devolución das competencias de xestión. Secasí, o fallo xudicial invalida a estrutura de poder compartida entre o deputado díscolo e o Partido Popular. O consello de Suplusa, que perde a potestade de xestión das residencias, deberá volver ao reparto orixinal e perderá a capacidade de elixir presidente. Noutras palabras: Martínez xa non poderá obter máis poder e emolumentos a cambio de votar xunto ao PP no pleno da Deputación.

4 COMENTARIOS

  1. […] Este desenlace representa un fracaso para a entente formada polo Partido Popular e mailo deputado non adscrito Manuel Martínez. As dúas partes ostentan conxuntamente a maioría na cámara provincial e no órgano decisorio de Suplusa. A sociedade urbanística lucense, presidida polo deputado díscolo, fora empregada para facer oposición interna ata que a xustiza certificou a subordinación deste ente á Deputación. […]

DEIXAR UN COMENTARIO

Please enter your comment!
Please enter your name here