A parlamentaria autonómica do PSdeG Patricia Otero destacou que a súa candidatura para liderar o PSOE de Lugo aspira á “integración” de toda a militancia. Di que o obxectivo é “remar xuntos” de cara ás eleccións autonómicas de 2020.

A deputada burelense compite para ser a secretaria provincial dos socialistas lucenses, cargo para o que tamén se postulou o alcalde de Castroverde, Xosé María Arias. Tanto Otero coma Arias xa participaran nas primarias de 2017, pero non lograron impoñerse daquela a Álvaro Santos, anterior xefe provincial que vén de dimitir.

“Eu preséntome para optar á secretaría provincial porque creo que é o momento de facer un partido forte na provincia. Preséntome para ter un equipo de integración e un equipo que mire cara ao futuro”, destacou. Otero incide en que pretende que “todos os militantes da provincia se sintan apoiados e integrados” no seu proxecto. “A miña idea é integrar todas as sensibilidades que poidan existir no noso partido”, resumiu.

A aspirante puxo o acento na necesidade de “apoiar”  todos os cargos do Partido Socialista, “desde o presidente da deputación, deputados provinciais, concelleiros e alcaldes”. “Que todos nos sintamos reflectidos neste proxecto para remar todos na mesma dirección de cara ás autonómicas do próximo ano”, remarcou a candidata.

LARA MÉNDEZ

Pola súa banda, a alcaldesa de Lugo, Lara Méndez, que presidía o partido na provincia ata a dimisión de Santos, resaltou que “hai dous compañeiros que dan este paso adiante para asumir unha responsabilidade e para min iso sempre é de valorar e sempre é positivo”, indicou.

“Eu sempre dixen que, afortunadamente, temos moitos compañeiros e compañeiras con capacidade e dispostos a asumir calquera responsabilidade no partido. Estamos nese proceso e haberá que esperar a que falen os militantes e as militantes de base”, resolveu, sen mollarse.