A sociedade urbanística lucense Suplusa é un ente subordinado ao goberno da Deputación de Lugo, así o certificou a xustiza. O executivo que preside Darío Campos pode atribuír ou retirar encomendas, mais non ten capacidade para retirar os medios propios ou disolver a empresa pública encargada da construcción das residencias da terceira idade, entre outras funcións. Iso é competencia do pleno provincial. Porén, existe un mecanismo que pode conducir á extinción de Suplusa: a intervención administrativa.
Este extremo comezou a explorarse hai dous meses, cando a Audiencia Provincial de Lugo tumbou a modificación dos estatutos da sociedade, que outorgara novas potestades ao Consello de Administración ata convertir a Suplusa nun auténtico contrapoder na provincia. A intervención xudicial frustrou un aparello que camiñaba dende a deslealdade institucional cara a compra de favores políticos con soldos públicos.
Pouco antes, o grupo socialista impulsara unha moción para a disolución da sociedade do solo que estivo a piques de saír adiante, mercé á expulsión durante o pleno de Manuel Martínez, alcalde de Becerreá, deputado non adscrito e presidente de Suplusa. A retirada dos deputados do Partido Popular frustrou aquela tentativa, pero desta vez non hai manobra posible.
No pleno, os populares e Martínez suman 13 representantes, un máis ca suma do Partido dos Socialistas de Galicia (10) e Bloque Nacionalista Galego (2). A proposta de suprimir Suplusa e integrar os traballadores na Deputación, como se fixo coa Fundación TIC, non pode prosperar. En consecuencia, o executivo conta unicamente co recurso á intervención administrativa, agora mesmo baixo estudo xurídico.
Así, os catro servizos legais adscritos á Deputación –Secretaría Xeral, Contratación, Intervención e Asesoría Xurídica– deberán dilucidar se a “situación de desgoberno” pode motivar a intervención administrativa. Fontes do goberno socialista confían nesta vía, que cualifican de “acto común na administración”, pois xa a empregou a Xunta de Galicia na Cámara de Comercio de Lugo.
Devandita intervención suporá, en palabras da deputada socialista –e membro do consello de Suplusa– Pilar García Porto, que “os funcionarios pasarían a facerse cargo da entidade provincial para facela útil”. O proceso, asegura, é “fácil de entender”. Malia que a disolución sería un procedimento máis rápido, a deputada precisou que a intervención podería estar resolta nun prazo de dous meses.
O PP segue o xogo a Martínez cun acto non oficial na residencia da Fonsagrada
[…] O concello en cuestión xa solicitara en xullo a cesión do inmoble e os fondos para o seu funcionamento, a pesar de nunca asinar coa Deputación o convenio imprescindible para obter tales recursos. Financiamento á parte, o mandado do pleno provincial implica que o executivo renuncie a abrir forzosamente a residencia, logo de retirar as competencias a Suplusa para tal fin e recuperar a titularidade do centro, a expensas do que poida decidir a xustiza sobre a sociedade do solo lucense, e da posible intervención administrativa. […]