O executivo de Lara Méndez abandona a polémica ordenanza mordaza. O grupo socialista de Lugo entende que o borrador plantexado carece de consenso abondo, e desbota continuar malia o apoio de Partido Popular e Cidadáns. A decisión chega dous días despois do ultimátum do Bloque Nacionalista Galego, que ameazara con retirar indefinidamente o apoio no pleno se o cambio normativo seguía sobre a mesa en outubro.
De novo o proxecto volve quedar na gabeta, como xa sucedera en tempos de López Orozco. A promulgación dunha ordenanza de convivencia máis restritiva era un desexo do empresariado de Lugo. Desta vez, a renuncia prodúcese en plena carreira electoral, a tan só sete meses dos comicios municipais. Na dirección local do Partido Socialista pesaron as dúbidas legais e a contestación social, mais tamén aparecer na fotografía canda os partidos da dereita.
O certo é que a presión aumentou considerablemente en datas recentes. Todo parecía indicar que o verán era o intre propicio para aprobar a ordenanza cívica, polo que as forzas da esquerda e os movementos sociais permaneceron en garda e alertando contra esta posibilidade. Comprobadas as reticencias do consistorio, comezaron novos actos reivindicativos que culminaron coa manifestación do 26 de setembro. As mensaxes do Concello tentando mitigar o alcance da norma foron ineficaces.
Semellaba evidente que a ordenanza decaería indefectiblemente, mais o Bloque quixo precipitar a retirada e ameazou con deixar de apoiar as votacións provintes da bancada socialista. Para evitar máis problemas na sempre complicada tramitación plenaria, Lara Méndez decidiu anunciar publicamente a retirada do proxecto. A fronte nacionalista apuntouse un tanto sen custe político, aínda que o voceiro Rubén Arroxo dixera que era un logro da cidadanía, instando a solucionar os problemas de Lugo coa actualización das ordenanzas xa existentes.
Ben distinta foi a acollida do anuncio nas filas do Partido Popular. O representante Antonio Ameijide dixo que esta “rendición” “deixa patente a covardía” da alcaldesa, á que acusan de “plegarse ao chantaxe do BNG”. Os populares consideran que o goberno local antepón os intereses de quen incumpre a lei, co pretexto de “tentar manterse no sillón”. Para Ameijide, este feito demostra que “goberno é débil” “e que xa está pensando no xeito de tentar gobernar o vindeiro ano”.
