InicioSociedadeO Colexio de Traballo Social considera a ordenanza cívica "antidemocrática"

O Colexio de Traballo Social considera a ordenanza cívica “antidemocrática”

A asociación oficial considera que o borrador da ordenanza é demagóxico e amosa un fondo de racismo e aporofobia sen aportar solucións para os colectivos excluídos

PUBLICADA O

- Advertisement -

O Colexio Oficial de Traballo Social de Galicia (COTSG) amosa a súa preocupación por varios dos artigos contidos no borrador da Ordenanza de Seguridade e Convivencia de Lugo. No organismo consideran que a norma proposta polo grupo socialista –e apoiada por Partido Popular e Ciudadanos– afonda nos problemas dos colectivos en risco de exclusión social e non contribúe a aportar solucións de fondo.

Este posicionamento prodúcese no medio da escalada do enfrontamento entre Lugo Sen Mordazas e o Concello. O movemento asambleario considera a norma un retroceso nas liberdades civís e denunciou coaccións sobre as xentes do barrio da Tinería. Dende a alcaldía alimentaron a polémica da multa de 300 euros pola recollida de sinaturas contra a ordenanza coa eliminación dun mural reivindicativo realizado pola plataforma crítica.


Trala análise, o COTSG ten dúbidas sobre a redacción da norma. Os artigos 37 e 38 sobre a mendicidade son “demagóxicos” e revelan “un fondo de aporofobia”, porque traslada que as persoas excluídas non o son polo contexto socioeconómico, senón “porque queren”. As traballadoras sociais explican que o texto “expresa a idea de que as persoas sen fogar son violentas e a realidade non ten nada que ver […] busca confirmar un estereotipo”. Nesa mesma liña censuran o artigo 40, con medidas coercitivas que recaen sobre estas persoas sen fogar, e para as que non existen alternativas.

O organismo oficial salienta asemade o contido dos artigos 41, 42 e 43, “completamente mal formulados porque neles ponse na mesma situación á prostituta e aos prostituidores e/ou clientes”. Aclaran que o “monopolio de poder son eles” mentres que elas son “a miúdo persoas vulnerables que exercen a prostitución como única alternativa a un sistema de desigualdade que as marxina”. Deste xeito, penalizalas a elas só contribuiría a empeorar a situación.

Tampouco se ofrecen solucións para a venda ambulante, nunha lexislación que “afonda no racismo e a discriminación”. A asociación de traballadores sociais sinala que “non deben levarse a cabo accións penalizadoras para abordar esta problemática social porque só traen consigo que a cidadanía teña máis prexuízos”, eliminando sen outra alternativa a principal fonte de ingresos destes colectivos.

En conxunto, o borrador da ordenanza é segundo o Colexio “antidemocrático e penaliza a liberdade de expresión de asociacionismo e activismo, mentres que protexe calquera tipo de acto que organice ou no que colabore o Concello”. Defenden o activismo como “peza fundamental para avanzar socialmente” porque empodera as persoas, e polo tanto debería ter espazos de expresión na cidade de Lugo.

Así as cousas, o COTSG conclúe que “os procesos de reconstrucción social deben facerse de abaixo a arriba, escoitando a todo o conxunto da cidadanía e dándolle a posibilidade de ser partícipes no cambio”. E inciden en que “unha ordenanza de seguridade e convivencia que só reprime e non busca solucións nunca vai lograr unha cidade máis cohesionada e participada”.

ÚLTIMAS

Denuncian o estado ruinoso dunha ponte medieval, paso de peregrinos

Alertados por uns veciños, dende o Colectivo Patrimonio dos Ancares acaban de comunicar á...

Descubrindo o cemiterio de San Froilán

Os cemiterios son unha desas infraestruturas que resulta imprescindible para calquera cidade. Cada vez os...

(Vídeo) Así quedou unha mámoa protexida en Navia de Suarna, cun gran buraco de case medio metro de profundidade

As asociacións solicitan ante a Dirección Xeral do Patrimonio Cultural que se realice unha...

O BNG insta o Senado a rexeitar o proxecto de Altri tras o “clamor social” manifestado en Palas de Rei

A senadora do BNG, Carme da Silva, defenderá esta semana unha moción no pleno da Cámara...