O Concello de Lugo celebrará o este venres 13 de novembro o acto institucional de nomeamento, a título póstumo, de Mariano Castiñeira Villaseca como Fillo Adoptivo da cidade. Con esta distinción, Lugo recoñece unha vida marcada pola súa vinculación co deporte, o coñecemento, a entrega aos demais e o compromiso coa cidade.

A alcaldesa, Elena Candia, destacou o enorme recoñecemento e afecto que Mariano Castiñeira espertaba entre a cidadanía lucense, así como a pegada que deixou en tantas persoas ao longo da súa vida. Ao acto, que terá lugar no auditorio Fuxan os Ventos, tamén asistirán representantes de clubs e persoas do ámbito deportivo que compartiron con el anos de aprendizaxe, consellos e experiencias.

Durante a cerimonia, a familia recibirá os símbolos institucionais da distinción: o diploma acreditativo será entregado á súa viúva e cada un dos seus tres fillos recibirá unha placa conmemorativa. Será un dos momentos centrais dunha homenaxe que quere recoñecer oficialmente a súa traxectoria e lembrar tamén a súa dimensión humana e a súa contribución á vida da cidade.A música acompañará os distintos momentos do acto. O cuarteto de clarinetes Díese interpretará varias pezas galegas ao longo da cerimonia.

O Concello convida a toda a cidadanía a participar neste recoñecemento a Mariano Castiñeira Villaseca, unha distinción que acadou un acordo unánime no pleno de celebrado en xuño deste ano.