Concello de Lugo levará o Arde Lucus á 29ª edición de INTUR, a Feira Internacional de Turismo de Interior que se celebra en Valladolid, cunha programación especial para dar a coñecer fóra de Galicia esta festa declarada de Interese Turístico Internacional.
A participación nesta feira turística é froito do traballo conxunto entre o Concello e as asociacións que fan posible a celebración. Na reunión mantida o pasado 8 de setembro acordouse impulsar novas vías para levar o Arde Lucus fóra de Lugo, incluíndo a presenza en feiras como INTUR e a promoción conxunta con outras cidades que contan con festas de recreación histórica.
Unha expedición formada por 16 asociacións e 173 participantes viaxará a Valladolid o sábado 14 de novembro, con saída de Lugo prevista para as 11:30 horas, para desenvolver actividades durante a tarde-noite tanto no recinto feiral como no centro da cidade. Será a primeira vez que os integrantes destas entidades leven directamente a súa recreación histórica a esta cita, converténdose nos principais protagonistas da promoción.
Esta presenza permite presentar o Arde Lucus como un exemplo de aproveitamento turístico do patrimonio material e inmaterial, compartindo a historia e as tradicións de Lugo, dándolles visibilidade ante novos visitantes e establecendo relacións con outros destinos. A promoción exterior resulta fundamental para seguir dando proxección internacional á festa e manter o recoñecemento acadado, cumprindo coa normativa que regula esta distinción mediante accións de difusión continuada para chegar a novos públicos.
Así mesmo, a delegación lucense aproveitará a cita en INTUR para presentar a próxima edición do Arde Lucus, que se celebrará os días 17, 18, 19 e 20 de xuño de 2027, e convidar a visitantes e profesionais do sector a descubrir Lugo.
Programa en INTUR para o sábado 14 de novembro
A programación do sábado 14 de novembro arrancará ás 17:30 horas cun desfile de romanos e castrexos no recinto de INTUR. A comitiva partirá do espazo habilitado pola Xunta de Galicia na feira e percorrerá as instalacións para mostrar a recreación histórica ao público.
Ás 18:00 horas, nunha das prazas do recinto feiral, celebrarase unha demostración do tradicional ritual da queimada, a petición da propia organización de INTUR para incorporar esta expresión da cultura popular galega.
A continuación, os participantes trasladaranse ao centro de Valladolid para realizar un novo desfile entre a praza de Colón e a praza Maior. A xornada incluirá unha recepción institucional por parte do alcalde de Valladolid, unha recreación dunha batalla entre castrexos e romanos a cargo das entidades participantes, un conxuro arredor da queimada e un desfile final das tropas romanas e castrexas polas rúas do centro da cidade que concluirá na praza Maior.
Dende o Concello de Lugo destácase o papel e a implicación ao longo de todo o ano das 16 asociacións participantes, que serán as encargadas de levar en primeira persoa a Valladolid a historia, a recreación e o espírito da festa lucense.
