Á saída da comisión de seguimento predominaba o abraio. O Concello convocara a Mesa de Traballo que avalía a reconversión do antigo Hospital Xeral de Lugo para informar da decisión da Xunta de Galicia de suprimir os usos non sanitarios comprometidos no plan integral da Residencia, barrio que leva sete anos agardando por este proxecto revitalizador, e que incluía un centro de emprendemento aeronáutico, unha oficina de emprego, un centro residencial para a terceira idade e unha planta de biomasa.
Segundo consta na documentación oficial, o executivo galego anulou a retrocesión de dous edificios do complexo, extremo indispensable para darlles novo uso. Fíxoo o 31 de maio, mesmo día en que comezaba o debate da moción de censura, e evitou comunicar esta decisión as partes implicadas. Uns xeitos opacos cuestionados na corporación municipal, que solicitará unha xuntanza urxente co conselleiro de Facenda, Valeriano Martínez.
A voceira de Lugonovo, Cristina Pérez Herráiz, cualificou o acordo do Consello autonómico de “sabotaxe institucional”. Na formación lembran as “grandes algaradas” coas que se asinou o protocolo do proxecto, estragado “con sixilo e aleivosía, pola porta de atrás”. E consideran que a cancelación dos trámites da Residencia tenta impedir “que os réditos da actuación os amortice a oposición”.
“Unha vez máis podemos comprobar o valor das promesas dos dirixentes do Partido Popular –continuou a representante de Lugonovo–. Velaí o que lle importan o progreso e a mellora da calidade de vida”. Dende o Bloque Nacionalista Galego comparten esta aproximación, e avisan de que a anulación do protocolo é “outro regalo envelenado de Feijóo para o candidato do PP en Lugo”, en palabras de Rubén Arroxo, candidato dos nacionalistas á alcaldía.
Así, o líder da agrupación local do Bloque aprecia que se repite “o sucedido co Servizo de Hermodinámica”, o que considera “unha decisión política de castigo a Lugo”. Arroxo lamentou a manobra unilateral no que considera un efecto “das liortas internas”. Este venres será presentado o alcaldable do Partido Popular en Lugo, Ramón Carballo, outrora subdelegado do Goberno e actual xefe territorial da Consellería de Presidencia.
