O mozo detido en Lugo por unha suposta agresión sexual ocorrida a pasada fin de semana quedou en liberdade tras declarar ante o xulgado de instrución número tres do Tribunal de Instancia da cidade, despois de case tres días no calabozo.
A autoridade xudicial decretou como medida cautelar unha orde de afastamento respecto da vítima, ao considerar que non concorrían circunstancias suficientes para o seu ingreso en prisión, aínda que esta tampouco foi solicitada polo Ministerio Fiscal.
O caso foi instruído pola Unidade de Atención á Familia e Muller (UFAM) da Policía Nacional. Durante a comparecencia, que se prolongou durante polo menos dúas horas, declararon tanto o investigado como a denunciante, acompañados dos seus respectivos letrados.
O detido, un home de ao redor de 27 anos, foi arrestado o domingo pola noite nun local de lecer no que estivera previamente na zona de Augas Férreas.
Segundo a denuncia, os feitos producíronse na madrugada do sábado nas inmediacións do barrio de San Fiz, tras coñecerse no mesmo local onde foi detido.
A moza acudiu ao Hospital Universitario Lucus Augusti, onde se activou o protocolo de atención a vítimas de agresión sexual, xa que durante a exploración médica detectáronse erosións en distintas partes do corpo da denunciante.
O proceso continúa aberto e a Policía Nacional segue solicitando probas para esclarecer o sucedido neste caso, porque o home será investigado por un delito de agresión sexual e, mentres tanto, non poderá achegarse nin comunicarse con ela.
