Un home de 30 anos de idade e veciño de Lugo faleceu na noite deste luns nun accidente de tráfico rexistrado tras saírse da vía despois de atropelar un xabaril e chocar contra o muro dun alpendre en Rodeiro (Pontevedra).
Segundo os datos facilitados pola Garda Civil de Tráfico a Europa Press, o sinistro tivo lugar sobre as 23:45 horas deste luns no quilómetro 17,100 da estrada PO-533 ao seu paso polo Alto do Faro, dirección Lalín, no termo municipal de Rodeiro.
O vehículo no que circulaba o mozo saíuse da vía tras atropelar a un xabaril e acabou chocando contra o muro dun alpendre, construción que rematou por caerlle enriba, tal como indicaron as mesmas fontes.
Ata o lugar dos feitos acudiron unha ambulancia asistencial de soporte vital básico e efectivos do PAC de Lalín para atender dous pacientes. O home de 30 anos, A.L.F., foi excarcerado do vehículo polos Bombeiros do Deza pero, a pesar dos esforzos, faleceu no punto. Pola súa banda, outro varón, de 54 anos e con iniciais P.L.A., foi trasladado ao Punto de Atención Continuada de Lalín.
