O voceiro provincial do PP de Lugo, Antonio Ameijide, acusou o PSOE de “seguir amparando” e “defendendo” a José Tomé, agora “en sede xudicial”, despois das declaracións realizadas este martes por catro mulleres no marco da causa aberta contra o aínda alcalde de Monforte por presunto acoso sexual. “Todo apunta a que cada vez hai máis indicios de que Tomé tivo, supostamente, unha actuación máis ca cuestionable, malia que no PSOE o seguen defendendo”, sosteñen os populares nun comunicado.

Ameijide valorou deste xeito a xornada de declaracións celebrada nos xulgados lucenses e criticou que os socialistas manteñan a Tomé tanto como alcalde de Monforte como deputado provincial. “Non lles queda máis remedio que mantelo se non queren perder o goberno da Deputación de Lugo”, afirmou.

O voceiro provincial lembrou, ademais, que o PP puxo enriba da mesa a posibilidade de apoiar outro candidato do PSOE para asumir a Alcaldía de Monforte, unha opción que, segundo critica, os socialistas non aceptaron. “Pero non a aceptan porque seguen protexendo unha persoa investigada pola xustiza”, sostivo Ameijide.

O dirixente popular elevou finalmente as súas críticas ao apoio que, ao seu xuízo, continúa recibindo Tomé por parte dos socialistas lucenses. “Tal é o nivel de amparo e protección que o PSOE lucense lle dá a José Tomé que non teño ningunha dúbida de que o vindeiro ano concorrerá ás eleccións municipais encabezando a lista do Partido Socialista”, sentenciou Ameijide.