Desimputado pola contratación do servizo de grúa no marco da Pokémon, José López Orozco entende que o arquivo parcial é extensible a toda a causa. Para o exalcalde de Lugo, o auto da Audiencia e mailo informe remitido pola Fiscalía “son claros, concisos e contundentes”, e por tanto a peza paralela da ORA seguirá o mesmo camiño cara o sobresemento. Por este motivo, censurou o papel que xogaron a xuíza Pilar de Lara, o BNG e Lugonovo no seu paso atrás tralos comicios de 2015.
Orozco xa fora liberado de responsabilidades penais na Operación Campeón e na peza separada da Fábrica da Luz, un total de seis investigacións. Este feito levou o outrora rexedor a declararse “campión das desimputacións”. Chanzas á parte, amosouse molesto co retraso do proceso xudicial, explicando que descoñece onde está o sumario sobre a concesión da ORA. “Non sabemos se a xuíza enviouno a Madrid ou non. Non o sabemos”.
1.-No puedo olvidar lo q ha pasado durante estos últimos años. Una instrucción q no recibe nada más que reveses. Instituciones judiciales que a pesar d todo funcionan y una vida política truncada por aquellos que en las urnas no me podían vencer. Pero tambien recuerdos gratos.
— José López Orozco (@jlopezorozco) 28 de setembro de 2018
A instructora da Pokémon, Pilar de Lara, protagonizou parte das críticas lanzadas por Orozco nas redes sociais. O político retirado cuestionou a instrucción, “que non recibe máis que reveses”, alegando inconsistencia nos indicios. E lamentou así mesmo a filtración do sumario, que levou os socios de investidura do Partido Socialista, Bloque Nacionalista Galego e Lugonovo, a vetar a Orozco. “O triste é que sexan de esquerdas, condenáronme por non escoitarme, e hoxe non son alcalde pola súa condena”.
As críticas contra De Lara chegan asemade dende as filas socialistas. Argelio Fernández Queipo, vicepresidente da Deputación e alcalde da Fonsagrada, esixiu a rendición de contas por parte da xuíza. “Ás veces a xustiza entorpece a vida pública, a vida política, facendo que persoas que poden dar moito á sociedade se vexan apartadas”. O representante provincial afirmou que “o dano xa está feito” e lamentou que “a quen tomou a decisión non se lle van pedir contas”. Queipo asegura que realiza estas declaracións baixo o máximo respecto ás sentencias e órganos xudiciais, mais pedindo que ese mesmo respecto “sexa extensivo a aquelas persoas que prestamos o noso traballo a nivel social”.
6.-A pesar de que se vulneraba la Constitución y la Declaración de los Derechos Humanos, dimito ante la presión de aquellos que fueron incapaces de ganarme en las urnas. Es de lo que mas me apena: ver a una llamada izquierda cobrarse una víctima política de un modo tan torticero.
— José López Orozco (@jlopezorozco) 28 de setembro de 2018
Malia a visible satisfacción pola decisión da Audiencia, Orozco terá que afrontar outras tres causas pendentes. Ademais da contratación da ORA, terá que responder pola construcción das Torres do Garañón -asunto para o que pedirá o arquivo a vindeira semana-, e polo nomeamento dun asesor no Concello de Lugo.
