Para a presidenta do Partido Popular na provincia de Lugo, Elena Candia, a polémica pola planificación do Campus Terra é unha “película” do seu homólogo do Partido Socialista, Álvaro Santos. O grupo conservador defendeu o acordo inicial cos reitores sen aclarar se hai sobre a mesa novas reducións na oferta educativa, hipótese que fixo fracasar a moción presentada pola formación que ostenta o goberno provincial. O deputado non adscrito Manuel Martínez foi de novo decisivo para inclinar a votación, logo de acusar aos socialistas de politizar a negociación no seo da universidade.
Candia acusou a Santos de estar instalado nun “ataque ideolóxico e partidista” e de despreciar as opinións “dos máis entendidos na materia”. A presidenta dos populares referiuse ás declaracións do reitor Antonio López para tentar desmentir os argumentos do adversario, definindo a folla de ruta 2017-2021 (a que a Xunta de Galicia negocia modificar) como “positiva” para a provincia. Lembrou, nese senso, as voces noutras federacións socialistas “que din que hai discriminación positiva cara a Lugo”.
A voceira do Partido Popular insistiu en que “non pode chamarse recorte, senón reorientación” á entrada de cinco novos graos, en detrimento de tres titulacións, en devandito período. “Prego que en temas tan trascendentes non intente politizar un documento de traballo aceptado unanimemente”, clamou Candia, que lembrou o papel da Deputación, e en particular de quen fora presidente da institución, Francisco Cacharro, na realización e ampliación do Campus Terra.
Para tentar reconducir a moción, o Partido Popular presentou dous puntos de enmenda, a través dos cales condicionar a negociación entre a Consellería de Educación e o Sistema Universitario Galego, para salvagardar as necesidades específicas do Campus Terra e frear a perda de alumnado. Porén, Santos censurou que tentara “desvirtuar o pronunciamento” da cámara, alegando que non poden avalar o proceso se existe a posibilidade de eliminar ou trasladar parte da actividade docente nas enxeñarías.
O líder dos socialistas lucenses explicou que o secretario xeral de Universidades, Xosé Alberto Díez de Castro, “deixou caer” que cómpre “pensar” a redución na oferta do Campus Terra na planificación 2017-2021. E precisou que na formación non cuestionan a folla de ruta en vigor, aínda que lamentan que a falta de oportunidades de emprego na provincia levase a prescindir de varias titulacións. “O que xera alarma –aclarou Santos– é que ninguén dixo con contundencia que os graos non serán eliminados ou debilitados a prol doutras provincias”.
Carballo propón un grao culinario en plena reestruturación do Campus Terra
