O presidente da Audiencia Provincial de Lugo, José Antonio Varela Agrelo, despídese a finais deste mes do cargo e opta a unha praza para o Tribunal Superior de Xustiza de Galicia (TSXG). “Eu fixen o que puiden”, afirmou tras unha década no cargo.
Varela Agrelo confirmou que “a finais” deste mes de novembro deixará de presidir a Audiencia de Lugo, onde leva 20 anos, dez como presidente. Así, despois dos trámites administrativos e tras a publicación no Boletín Oficial do Estado (BOE), “a finais de mes ou principios de decembro”, xa non estará en Lugo onde leva exercendo como xuíz desde 1983.
En canto ao alto tribunal galego, concretou que opta a unha praza na Sala do Civil e Penal. “No TSXG hai tres materias: o Contencioso Administrativo, materia civil e penal, que se agrupa nunha soa sala de cinco maxistrados. Nas outras salas hai varias seccións”, detallou.
En materia civil, “ocúpase de recursos de casación que por tratarse de dereito civil de Galicia non van ao Supremo”. En material penal, trata “causas contra aforados ou recursos contra sentenzas das audiencias (provinciais)”, puntualizou.
O maxistrado finalmente valorou estes 10 anos como máxima autoridade xudicial en Lugo cun balance “positivo”, aínda que admitiu que “houbo de todo”. “Eu fixen o que puiden”, concluíu.