Manuel Martínez está decidido a repetir como representante na Deputación provincial, e con tal obxectivo artella unha marca propia para a que anuncia marcas en varios concellos. O antigo referente do socialismo lucense conta con cabezas de carteis e afirma ter avanzadas as negociacións para axudarse de Independentes Terras do Asma (INTA), aínda que seguen sen existir mostras de apoio público.
Defenestrado no Partido Socialista, o rexedor de Becerreá e aínda presidente de Suplusa procura o xeito de ser “decisivo” no reparto de asentos: noutras palabras, impedir que Darío Campos, outrora amigo, repita na presidencia da Deputación. Para iso precisa o apoio dunha formación que, nas municipais de maio, acade representación abondo nalgún dos partidos xudiciais da provincia. O máis asequible é o de Lugo, onde con cinco mil papeletas podería sentar no pleno provincial.
“Eu creo que son factibles se a lista de Lugo funciona; se non hai lista en Lugo, está difícil porque os votos están aquí”. Así valora Martínez a situación na capital, onde conta con “varias” persoas que encabezarían a lista electoral nos comicios. Aliás, o problema reside “nos que van detrás”, é dicir, nas vinte e cinco persoas (e suplentes) que deben cubrir o resto de postos elixibles á corporación local.
O papel de INTA
A alternativa do deputado non adscrito conta con maiores posibilidades, como afirma o propio Martínez, no partido xudicial de Chantada, onde “está máis avanzado”. Nsta área transcomarcal conta cun aliado circunstancial, Independentes das Terras do Asma.
A aventura de INTA nace con Manuel Varela, rexedor de Chantada e saído das filas do Partido Popular. Martínez conserva boa relación con el e máis con Suso Otero, antigo subdelegado do Goberno, ex do Partido Socialista e inhabilitado cando era alcalde de Monterroso. Goberna a vila da Ulloa o seu sucesor na formación, Miguel Rico.
Os tres interfectos reuníronse publicamente, aínda que polo de agora o apoio de INTA está no aire. Como sinala GaliciaConfidencial, Varela e Otero manteñen silencio, reticentes perante a ambición política de Martínez.
Outro dos eventuais apoios podería chegar da man de Xosé María Arias, alcalde socialista de Castroverde e rival nas primarias do actual secretario xeral Álvaro Santos. Arias hai tempo que apoia a deriva política de Martínez, chegando ao extremo de dicir que o Partido Socialista “está morto”.
