A aprobación dos orzamentos provinciais pasou pola abstención do Partido Popular, que chegou á sesión plenaria cun entendemento definitivo co goberno da Deputación. A formación que lidera Elena Candia introduciu as enmendas que consideraba prioritarias, deixando atrás os intereses do deputado non adscrito. No acordo definitivo non constan os dous soldos que acordaran con Manuel Martínez, polos que cobraría outros 121.000 euros anuais.
Esta contía derivaba de dous acordos que dependeron do Partido Popular: o primeiro, no pleno da Deputación, para unha dedicación exclusiva de 50.000 euros; e o segundo, no Consello de Administración de Suplusa, sociedade que preside Martínez, e que supoñía para o histórico deputado socialista un salario de 72.000 euros, ademais da contratación dun asesor de confianza por 52.000 euros adicionais. A asignación como alcalde de Becerreá, aprobada en abril, é de 41.000 euros. Son cantidades que o presidente da Xunta, Alberto Núñez Feijóo, defendeu publicamente.
Finalmente, os populares facilitaron a aprobación das contas sen incluír nin a dedicación exclusiva na Deputación nin o soldo na partida específica de Suplusa, que ademais queda reducida con respecto ao orzamento anterior.
A abstención permitiu aos populares concretar medidas orzamentarias para as residencias da terceira idade, dando aos concellos a potestade de que poidan elixir a entidade que xestionará os centros da terceira idade (para que Suplusa poda manter esta función). O goberno provincial aceptou estas engádegas coa condición de que a escolla dos concellos se faga con arreglo á legalidade, á espera da postura xudicial sobre as encomendas de Suplusa.
