Volve o Salón Internacional de Turismo Gastronómico, Xantar, unha das grandes citas coa que a provincia de Lugo pon a súa riqueza gastronómica sobre a mesa e destaca a calidade dos seus platos. A cita, que este 2021 cumprirá 22 edicións, vén de ser inaugurada este mércores coa participación da Deputada provincial de Réxime Interior, Promoción do Territorio e Turismo, Pilar García Porto.
A participación da responsable provincial vén tamén motivada porque, un ano máis, a Deputación conta cun expositor para a promoción dos recursos etnogastronómicos e turísticos da provincia de Lugo, plataforma que agardan poder empregar para achegarse a un público “maior” e dar a coñecer o patrimonio dos 67 concellos da provincia.
Xantar, feira gastronómica organizada por Expourense, terá lugar dende este mércores 3 e ata o vindeiro domingo na capital ourensá. Nela promóvese a calidade da gastronomía e o turismo sustentable e saudable na comunidade galega. Reunirá a empresas de restauración, produtores e entidades públicas e privadas nacionais e internacionais.
De aí que García Porto anime a todas as persoas que visiten a feira a “achegarse ao stand da provincia de Lugo e descubrir todas as alternativas que ofrece o noso territorio, onde se pode escoller entre multitude de alternativas como o turismo cultural, gastronómico, de costa ou de natureza”.
