A contratación de Def con Dos para as festas do San Froilán non sentou ben a todos os grupos políticos, xa que o vocalista da formación foi condenado polo Supremo por facer apoloxía do terrorismo. Se o PP xa se apurou onte en censurar esta decisión, hoxe mesmo volveu incidir en que lles parece unha “provocación” para os lucenses e para as vítimas do terrorismo.
Así pois, o voceiro do PP municipal, Ramón Carballo, avanzou en roda de prensa que presentarán unha proposición a pleno para que o PSOE e Méndez se posicionen a favor ou en contra desta decisión. Pregúntanse se dende a alcaldía son “cómplices” ou se “se deixan someter á imposición” do seu socio de goberno.
Do mesmo xeito, Carballo tamén se mostrou desconforme ante a idea de subvencionar o transporte dende Madrid para vir ao concerto. Referíase á proposta que comunicou onte a edil responsable de Cultura, Maite Ferreiro (BNG), e que pretendía ofrecer unha posibilidade para aquelas persoas que se quedaron sen ver a Def con Dos en Madrid tras o veto que se impuxo ao grupo.
O plan dos nacionalistas vira arredor de facer de Lugo “un espazo para a liberdade de expresión”, pero a Carballo parécelle unha “tomadura de pelo” que se aferren a iso para xustificar unha contratación dun cantante condenado. Coidan que é unha “falta de respecto” cara aos cidadánse un intento por “politizar” unhas festas que “deberían ser de todos“. O voceiro do PP teme que esta sexa a tónica xeral de aquí en diante.
DESPREOCUPACIÓN POLAS NEGACIÓNS DO TERRORISMO MACHISTA
Pola súa parte, Maite Ferreiro defendeu a contratación e explicou que a sentenza que afecta a un dos integrantes do grupo produciuse por unha serie de chíos publicados en Twitter entre 2013 e 2014. Mentres que o PP os acusa de dar voz a unha persoa que enaltece o terrorismo, Ferreiro aféalles á súa vez a falta de preocupación polas “negacións do terrorismo machista” por parte da ultradereita coa que se relacionan.
CIUDADANOS
Tampouco a formación laranxa perdeu ocasión de entrar no debate. A portavoz do grupo municipal de Ciudadanos, Olga Louzao, opina que o goberno bipartito de Lugo non tardou demasiado en “ensinar a súa verdadeira cara” ao anunciar a contratación do grupo ‘Def Con Dos’ para as patronais de San Froilán.
Desde o seu punto de vista, “o goberno local está no seu dereito de contratar a quen considere oportuno”, pero lamentou que a primeira decisión do BNG no goberno en materia de cultura fose para “politizar estas festas”. De feito, Olga Louzao quixo lembrar que o actual tenente de alcalde, o nacionalista Rubén Arroxo, negouse cando formaba parte da oposición municipal á contratación do grupo ‘Taburete‘, porque na banda toca “o fillo de Bárcenas”.
Segundo a portavoz de Ciudadanos, o BNG vén de saltarse “a comisión de festas” para formalizar a contratación deste grupo para as patronais. “Mal empezamos cando unha das súas primeiras decisións é impregnar de ideoloxía as grandes festas desta cidade”, resolveu.
