A asociación empresarial Lugo Monumental denuncia que a exención no pago das terrazas prevista para o ano 2021 quedará “neutralizada” cunha “suba” de “ata o 600%” nos anos posteriores. O Concello alega que este aumento vén dado por un “imperativo legal” e que en ningún caso se tratou de “encubrilo”.
O colectivo emitiu un comunicado no que se aleda da decisión do Concello de Lugo de apoiar o sector hostaleiro no 2021 ao aliviarlles o pagamento das taxas das terrazas, pero non ven “razoable” que se suban dende o 2022, “algo que se oculta na información que publica a administración”.
Lugo Monumental explica que xa presentou alegacións ás taxas de ocupación da vía pública aprobadas no pleno do Concello no mes de outubro. Aseguran que tales taxas están baseadas nun “estudo de custos totalmente inasumible e que denota unha clara intención de incrementar os prezos de forma artificial para lograr uns ingresos que a lexislación non contempla”.
Segundo o estudo técnico do Concello, o valor do uso da vía pública elévase notablemente por cuestións como “perigosidade” ou “molestias“, algo que non se tiña en conta en exercicios anteriores. “O momento escollido para disparar os prezos das terrazas non parece o máis axeitado“, conclúen dende Lugo Monumental, asociación que agrupa a empresarios do casco histórico.
O QUE DI O CONCELLO
Pola súa parte, o Concello de Lugo deu explicacións tras o comunicado de Lugo Monumental. Dende o goberno local descartan que se trate dunha suba encuberta das taxas por ocupación da vía pública, senón que o incremento “obedece a un imperativo legal” xa coñecido.
Apuntan a denuncias e sentenzas xudiciais que obrigaban ao concello a facer a revisión das taxas, cuxo aumento se irá aplicando “de forma progresiva durante os próximos tres anos”, quedando o 2021 libre de pagamento. “De non ser así, o goberno local non tiña ningunha intención de incrementalas neste momento”, engaden.
