As restricións vinculadas á pandemia non poderán coa ilusión das crianzas, que agardan con ansia a chegada dos Reis Magos. As tradicionais cabalgatas do 5 de xaneiro reinventaranse en distintos puntos da provincia, como Lugo capital, Vilalba ou Sober.
As nenas e nenos lucenses poderán gozar dunha cabalgata “estática e segura“, tal e como detallou a concelleira de Cultura, Turismo e Promoción da Lingua, Maite Ferreiro, quen indicou que non se repartirán caramelos. Os Reis recibirán aos nenos entre as 11,00 e as 14,00 horas deste martes na praza Horta do Seminario e, entre as 17,00 e as 20,00 horas, na praza de Augas Férreas.
Ademais, a área de Xuventude do Concello propón unha Noite de Reis electrónica a través do streaming con música do DJ lugués Marcos Peón. O obxectivo é facer posible que o Nadal se poida seguir celebrando na casa, sen aglomeracións.
DE RUTA POLAS ALDEAS
En Vilalba, os tres Magos percorrerán once parroquias e mailo casco urbano para saúdar ás máis cativas. A ruta iniciarana ás 12:00 horas e pasarán polas Casas Escola de Árbol, Torre e San Simón; Román, Tardade e Lanzós; Goiriz, Santaballa e Nete; e Samarugo e Oleiros. Rematarán polas rúas da localidade vilalbesa.
Desta volta non haberá recepción de Melchor, Gaspar e Baltasar. Tampouco se entregarán agasallos dado o contexto sanitario actual.
Unha alternativa semellante é a que atoparon en Sober, municipio no que os Reis tamén visitarán os nenos parroquia a parroquia.
