A Policía Local de Lugo localizou a dúas persoas con Alzheimer que se ausentaron dos seus domicilios sen que os seus familiares puidesen controlar o momento da saída. En concreto, os axentes lograron localizar a un home desorientado nas proximidades da N-V, en Nadela. A procura foi posible grazas a unha pulseira de xeolocalización que portaba o desaparecido, a cal permitía á súa familia seguir o seu percorrido en tempo real a través dunha aplicación móbil.
O segundo caso, de maior complexidade, involucrou a unha muller de 68 anos con afasia avanzada que foi localizada tras tres horas de procura na rúa Ourense, tras a colaboración de patrullas da Policía Nacional e o servizo de radiotaxi. En materia de seguridade viaria, a Policía Local interveu en once incidentes significativos. Entre eles, destaca o control dun ciclista na Rolda da Muralla que arroxou un resultado positivo simultáneo en cocaína, metanfetamina, anfetamina e THC.
Así mesmo, rexistrou varias alcoholemias, a taxa máis alta, de 0,87 mg/l, detectouse nunha condutora na rúa Anduriñas que alegou estar a buscar unha farmacia de garda. Outros condutores foron interceptados nas rúas Miguel de Cervantes e Rei Chiquito con taxas que oscilaron entre os 0,67 e 0,78 mg/l, nalgúns casos tras realizar manobras “neglixentes” en zigzag.
