Un paciente do Hospital Psiquiátrico de Calde, en Lugo, propinou unha puñada a semana pasada a unha enfermeira auxiliar que agora se atopa de baixa, segundo denuncia o sindicato CSIF. En declaracións a Europa Press, María Gorgoso, delegada de prevención do sindicato, relata a Europa Press que é unha “agresión anunciada”, porque o paciente presentaba fixación con varios traballadores, entre eles a que sufriu o golpe.
A recomendación que lle daban os facultativos era non enfrontarse a el ou ignoralo, suxestións “un pouco utópicas” tendo en conta o tamaño da unidade. O pasado domingo 7 de xaneiro, cando a auxiliar se atopaba subida a unha escaleira descolgando uns adornos do Nadal, o home achegóuselle e deulle a puñada.
“Despois dicía que non se arrepentía e que quería darlle a máis xente”, agrega a delegada de CSIF, quen explica que o paciente está agora na Unidade de Agudos, no Hospital Universitario Lucus Augusti, que era “onde xa tiña que estar desde facía uns días”, tal e como advertiron os traballadores en diversas ocasións.
María Gorgosa cre que fallou a adecuada valoración do paciente, pero reclama tamén que o centro de Calde conte con máis seguridade e cun celador, algo que a dirección “di que non, porque se cumpren os cocientes” de persoal. “Pero son enfermos inestables“, apostila a sindicalista.
A auxiliar agredida está de baixa e “moi nerviosa”. Aínda que o golpe físico non revestiu gravidade, si temeu por perder a visión do ollo esquerdo, xa que no dereito perdeuna facía anos. Consultadas por este episodio, fontes da Xerencia da área Sanitaria de Lugo lembran que o Hospital de Calde conta coas “medidas de seguridade necesarias” para a asistencia que presta, así como con protocolos de actuación específicos para estes casos.
