Axentes do Corpo Nacional de Policía detiveron un suposto ladrón que utilizaba unha barra de ferro para forzar coches estacionados nas rúas de Lugo e así roubar os obxectos de valor que había no seu interior.

A detención do sospeitoso, un home de 44 anos de idade, foi posible grazas á colaboración cidadá, dado que unha veciña da rúa Isaac Díaz Pardo, chamou a última hora da tarde do sábado 6 de febreiro para avisar á Policía de que estaba a ver a un home cunha barra de ferro que ía “tentando” as fechaduras dos coches aparcados nesa vía.

Inmediatamente, as patrullas de servizo trasladáronse ao lugar indicado e os axentes localizaron ao sospeitoso agochado tras un dos coches aparcados nesa rúa. Xunto a el estaba a barra de ferro e, ao cachealo, tamén lle atoparon unhas luvas e unha lanterna, ademais de diversos obxectos sacados dos coches que forzara.

Os coches presentaban danos nas portas e o seu interior estaba “totalmente revolto”, segundo informou a propia Policía Nacional.

O detido foi posto ao dispor da autoridade xudicial, aínda que quedou en liberdade tras prestar declaración, á espera de xuízo