Localizan un condutor que fuxiu tras chocar contra un motorista e deixalo ferido grave

O accidente ocorreu en setembro na rúa Xosé Castiñeira. O autor dos feitos enfróntase a un delito contra a seguridade viaria e a outro de lesións por imprudencia grave con vehículo de motor. 

Imaxe do sinistro | LX

Unha investigación da Policía Local de Lugo permitiu localizar o condutor dun turismo que se deu á fuga tras chocar contra un motorista e deixalo ferido de gravidade.

O accidente ocorreu a finais de setembro na rúa Xosé Castiñeira. O coche circulaba polo Paseo dos Estudantes e avanzou cara á citada rúa sen deterse no sinal de STOP. Así, bateu frontalmente cunha motocicleta de gran cilindrada, cuxo condutor tivo que ser evacuado ao servizo de urxencias do HULA debido ás lesións provocadas.

O causante do sinistro ausentouse do lugar sen agardar, sen prestarlle auxilio á outra persoa e sen facilitar os seus datos. A pesar de que nese momento había bastante xente na rúa, ningún dos presentes puido axudar a identificar o condutor do vehículo.

Así, o equipo de atestados da Policía Local de Lugo activou un dispositivo de rastrexo exhaustivo, durante o cal se visionaron gravacións de cámaras de vixilancia da cidade, entre outros. A Policía comprobou que o home vendera o turismo no que circulaba só días despois do accidente. Así e todo, a investigación resultou coa identificación do autor dos feitos, que agora se enfronta a un delito contra a seguridade viaria e a outro de lesións por imprudencia grave con vehículo de motor. 

DEIXAR UN COMENTARIO

Please enter your comment!
Please enter your name here