EFE | Dous octoxenarios resultaron feridos esta mañá nun aparatoso accidente que se produciu por unha colisión nun túnel da A-6 ao seu paso polo municipio de Baralla. Ao parecer, o vehículo no que circulaban chocou contra un camión e bateu contra as pranchas de ferro que este transportaba.
O accidente produciuse ás 10:41 horas, segundo informou o 112, concretamente no túnel de Neira de Rei. Por mor da colisión o camión perdeu parte da carga de valos metálicos, que rematou ciscada pola autovía.
O 061 evacuou ao hospital Polusa de Lugo a un home de 88 anos de idade, con iniciais J. N. F, e a outro de 82, M. N. F. O 112 tamén mobilizou os Bombeiros de Sarria, o GES de Becerreá e a Garda Civil de Tráfico, que tivo que regular a circulación en sentido A Coruña, dado que un dos carrís aínda permanece pechado.
