A Plataforma Feminista de Lugo considera que o asasinato de Carmen Vázquez Cereijo, a muller de 47 anos que foi acoitelada presuntamente polo seu marido en Vilalba, veu a demostrar unha vez máis que as ordes de afastamento decretadas polos xulgados son “ineficaces” para protexer ás vítimas da violencia machista.

En declaracións a Efe, a portavoz da plataforma, Ana Torrón, asegurou que casos como o de Vilalba poñen de manifesto que as ordes de afastamento, se non van acompañadas doutro tipo de medidas de protección, “non serven absolutamente para nada”.

A Plataforma Feminista de Lugo convocou para esta tarde, a partir das 20:00 horas, unha concentración de “protesta pola recente onda de feminicidios e, en especial, polo de Carmen”.  Unha concentración coa que tamén pretende reivindicar a creación dun xulgado específico de violencia de xénero en Lugo, dado que é a única provincia galega que aínda non conta con este servizo.

“A necesidade está máis que justificada, por desgraza”, dixo Ana Torrón, “por tanta violencia como estamos a ver”. Desde o seu punto de vista, a creación dese xulgado é “absolutamente necesaria”, polo que esta plataforma, que “non depende de ningún partido”, non se vai a limitar a partir de agora “a gritar na rúa” para reclamar a súa creación, senón que “grazas á unión de máis compañeiras utilizará outros medios, como iniciativas ante as institucións, para conseguilo”.

Este colectivo tamén reclama máis medios “humanos, económicos e tecnolóxicos para conseguir a necesaria eficacia das ordes de afastamento, así como que se poña en marcha un programa de formación en materia de xénero para avogados e xuíces”.