A Fiscalía pide penas que suman 80 de cárcere para sete acusados de pertencer a un grupo criminal que se dedicaba a asaltar vivendas en diferentes municipios de Galicia, algúns deles con antecedentes, e que serán xulgados este martes na Sección Cuarta da Audiencia Provincial de Pontevedra.

Segundo o escrito de acusación pública, o modus operandi deste grupo consistía en que, mentres un deles facía labores de vixilancia e tiña un vehículo preparado para a fuxida, outras persoas entraban nas vivendas, ben polas portas que non tiñan o ferrollo botado ou ben polas xanelas, e apoderábanse dos obxectos de valor (xoias, sobre todo) e do diñeiro que atopasen.

Os acusados fixaban a súa atención en vivendas apartadas, habitadas por persoas de avanzada idade, “facilmente engañables” para convencelas de entrar con algunha escusa, e que non poderían opor resistencia no caso de que houbese un enfrontamento.

Así, a Fiscalía atribúelles case unha vintena de asaltos en vivendas de Salvaterra (Pontevedra), Ponteareas (Pontevedra), A Cañiza (Pontevedra), Mondariz (Pontevedra), Mos (Pontevedra), Cotobade (Pontevedra), A Lama (Pontevedra), Meis (Pontevedra), Fene (A Coruña), Culleredo (A Coruña), Begonte (Lugo) e Chantada (Lugo), cometidos entre xullo e setembro de 2016.

Nese tempo lograron facerse con máis de 6.000 euros, xoias valoradas en miles de euros, unha tablet, unhas chaves ou unha cartilla bancaria. Por estes feitos, a Fiscalía acusa a sete persoas de varios delitos –roubo con forza, roubo con violencia, furto, violación de morada, etc.–, e pide para as procesados penas que van desde os 24 anos de cárcere ata os 3 anos de prisión.