A Terraza do Pazo, no Pazo de Feiras e Congresos de Lugo, presentaba a principios de agosto un cartel de concertos con bandas e propostas musicais de moita calidade. Concertos que completaron a proposta deste local para o verán e na contorna do río que combina música en directo, terraza e servizo de comidas.
Dende o 7 de agosto, pasaron xa pola Terraza do Pazo os grupos MU2, Rayones, Niño Asqueroso, Ruxe Ruxe, Cabuxa Blue e Susie Q’s. E para pechar o ciclo, este sábado 26 de setembro chega dende Monforte a banda de rock & roll Doc Magoo’s.
Todos os concertos foron de balde para o público e programados en sesión de tardeo para as 21:00 h.
DOC MAGOO’S
Esta banda monfortina, que leva 26 anos rodando polos escenarios de toda Galicia, versiona aos grandes de todos os tempos. Nos seus concertos pódense escoitar temas míticos de rock & roll da escena musical internacional como, por exemplo, Neil Young, The Black Crowes, Prince, Police, Rolling Stones, Lenny Kravitz, The Doors, Beatles ou Bob Dylan.
