O Tribunal Superior de Xustiza de Galicia (TSXG) desestimou o recurso presentado polo Concello de Monterroso contra a sentenza do xulgado do social número 3 de Lugo pola que foi condenado a indemnizar ás traballadoras do servizo de axuda no fogar (SAF) que foron obrigadas a traballar os días 24 e 31 de decembro de 2020.
O fallo, difundido este xoves pola CIG, ratifica a condena ao consistorio monterrosino a indemnizar a cada traballadora con 50 euros máis intereses legais por cada un dos dous días que traballaran no nadal de 2020. A sentenza do alto tribunal galego dá por bos os argumentos da representación das empregadas, que alegaron que os días 24 e 31 de decembro non eran laborais e que, ao obrigar ás traballadoras a acudir ao seu posto sen ofrecer alternativa ou medida compensatoria, estaba a incorrer nunha modificación substancial das condicións de traballo (MSCT).
A central nacionalista aplaude o fallo do TSXG ante o que considera como un “acto de prepotencia, desprezo e caudillismo” do Executivo local cara ás súas empregadas, á vez que o interpretan como a “restauración” da “honorabilidade e profesionalidade” das traballadoras.
Así, considera que a alcaldesa de Monterroso, a independente Rocío Seijas, debería pedir desculpas publicamente ás traballadoras polas súas críticas cara a elas no pleno municipal, á vez que insta o goberno municipal “a rectificar na súa soberbia e caprichosa política de persoal”.
