Os novos contaxios de Covid-19 subiron lixeiramente ata os 116 no conxunto de Galicia tras iniciar esta semana con 107, mentres que os casos activos deste coronavirus aumentaron a 2.805, tras o descenso da xornada anterior. Pola súa banda, os pacientes hospitalizados mantéñense en 176.
Segundo os datos actualizados na mañá deste martes pola Consellería de Sanidade con rexistros ata as 18,00 horas deste luns, seguen 37 pacientes Covid ingresados en UCI en Galicia e 139 noutras unidades de hospitalización. E hai 2.629 en seguimento nos seus domicilios.
Por áreas sanitarias, a presión hospitalaria baixa na de Lugo onde seguen dúas persoas en críticos e redúcense a sete os doutras unidades –unha menos–.
MÁIS CASOS ACTIVOS
En canto aos casos activos, tras cinco xornadas consecutivas en descenso, aumentaron lixeiramente ata os 2.805, que supoñen 16 máis, ao haber máis contaxios (116) que altas (98), ao que se engaden dous falecidos. Por áreas sanitarias, en Lugo hai 4 casos activos máis co que suman 223.
AUMENTO DE CONTAXIOS
Pola súa banda, os novos contaxios de Covid-19 subiron lixeiramente a 116 no conxunto da Comunidade galega, despois de arrincar esta semana con 107, o que supón nove máis. Do total, 105 foron positivos confirmados por PCR nas últimas 24 horas, deles seis na de Lugo.
Pola súa banda, a taxa de positividade –porcentaxe de infeccións por test PCR realizados– mantense por baixo do dous por cento nun 1,3% tras iniciar a semana cunha baixada ao 1,6%. Deste xeito, continúa por baixo do 5% que a Organización Mundial da Saúde (OMS) fixa para dar por controlada a pandemia. A última vez que a Comunidade galega excedeu esta barreira foi o 15 de febreiro.
