O subcomité clínico de expertos reunido este venres decidiu modificacións nos niveis de restricións dalgunhas áreas sanitarias e concellos galegos. Na provincia de Lugo, A Pobra do Brollón sobe a nivel máximo de restricións (que implica peche perimetral), mentres que Paradela súmase a Guitiriz e Lourenzá como municipios con restricións de nivel alto. As medidas entrarían en vigor ás 0:00 horas do vindeiro luns.
O resto de concellos mantéñense en nivel baixo, polo que seguirán tendo permitida a mobilidade entre eles e a apertura da hostalaría en terraza (ao 50%) e no interior (ao 30%).
A veciñanza de Guitiriz, Paradela e Lourenzá só poderá desprazarse entre estes tres termos municipais. Nestes lugares, bares e restaurantes só poderán abrir ao 50% no exterior. Na Pobra do Brollón non estará permitida a apertura do sector hostaleiro nin a mobilidade intermunicipal.
ÁREAS DA CORUÑA E PONTEVEDRA
Por outra banda, o subcomité clínico decidiu levantar o peche perimetral nas áreas da Coruña e Pontevedra dende o vindeiro luns, co que a mobilidade nestes concellos dependerá unicamente da súa incidencia.
