O Servizo Galego de Saúde (Sergas) realizou un cribado no colexio lucense de Paradai logo de que se confirmara a existencia dun gromo vinculado á cepa británica neste barrio, con 60 persoas infectadas (alumnado, nais e pais e persoal docente). As probas efectuadas por Sanidade o venres 19 de febreiro non destaparon máis casos.

O propio Sergas informou de que, ademais das PCR realizadas ás persoas que se atopan illadas, realizouse un cribado no centro e un total de 120 persoas foron sometidas ás correspondentes probas para detectar novos contaxios.

Finalmente, todas esas probas deron negativo, pero mantéñense as medidas de precaución adoptadas no seu momento para evitar que ese foco se propague e poida dar orixe a novas cadeas de transmisión.

O director asistencial do Sergas en Lugo, Rafael Monte, precisou á prensa que a “semana pasada foron detectados os “primeiros casos”, o que levou ás autoridades sanitarias a realizar primeiro “cribados por aulas”, pero “visto o elevado número de casos, realizouse un en todo o colexio”.

Monte recoñeceu que existe a sospeita de que este gromo, do mesmo xeito que sucedeu co de Guitiriz, está relacionado coa chamada “cepa británica”, que se caracteriza por unha “maior transmisión”, aínda que tamén aclarou que “non existe evidencia de que provoque unha maior gravidade clínica” nin tampouco que faga aumentar “o nivel de ingresos”.

Monte recoñeceu que “era de esperar”, visto o que sucedía na nosa contorna, que esa cepa se estendese a Lugo. En todo caso, precisou que “as medidas” de prevención e hixiene para facer fronte a esa nova cepa do Covid-19 son as mesmas que as indicadas con carácter xeral.