O portavoz parlamentario do PPdeG, Alberto Pazos Couñago, esixiu ao PSdeG e ao BNG que “asuman responsabilidades” por “permitir” que José Tomé continúe como alcalde de Monforte de Lemos e como deputado non adscrito na Deputación de Lugo.
Despois de que este luns transcendese que a Fiscalía Provincial de Lugo interpuxo unha querela contra Tomé por “un presunto delito de acoso sexual e de abuso no exercicio da función pública”, Pazos Couñago subliñou que para gobernar no municipio lucense conta “co apoio dos concelleiros socialistas”, así como “de Besteiro”.
Neste punto, o portavoz popular cuestionou ao PSOE e ao BNG “que van facer” agora que “hai unha denuncia no ámbito xudicial”. “Preguntámonos se van seguir normalizando esta situación e apoiando publicamente a unha persoa acusada de presunto acoso sexual”, aseverou o deputado popular.
Por todo iso, Alberto Pazos pediu “responsabilidades”, tanto a José Tomé, a quen seguen “esixindo a dimisión”, como “para quen permite que siga ostentando os cargos, o PSOE e o BNG”.
“NIN UN MINUTO MÁIS” NOS CARGOS
Mentres, a viceportavoz do BNG Olalla Rodil, a preguntas dos medios tras a xunta de portavoces, reiterou que José Tomé “non debe seguir nin un minuto máis nin como alcalde nin como deputado provincial”.
Nesta liña, cualificou de “gravísimo” o que se soubo “desde o principio” e recoñeceu que agora se dá “un paso máis aló” coa apertura de dilixencias por parte de Fiscalía.
“Creo que debería de presentar a dimisión de todos os seus cargos, que é a posición que sempre mantemos desde o BNG, sexa quen sexa. Foi Tomé e foi Villares, que naquel momento estivo catro meses sentado no Consello da Xunta cunha denuncia nos xulgados”, reprochou.
O PSDEG DEFENDE A SÚA ACTUACIÓN
Pola súa banda, a viceportavoz do PSdeG Elena Espinosa, cuestionada sobre se os concelleiros socialistas de Monforte deben seguir apoiando a Tomé, evitou pronunciarse, insistindo en que os socialistas asumiron “responsabilidades desde o primeiro momento”.
Así, reiterou que, tras a entrada do caso no ámbito xudicial, Ferraz paraliza o expediente aberto para “deixar que a xustiza obre libremente”.
Neste contexto, reivindicou que o PSOE “non é o PPdeG nin o PP”, pondo como exemplo que os populares “tiveron escondida unha denuncia por unha posible agresión sexual contra o conselleiro do Mar” e que o PP de Madrid “mantén ao alcalde de Móstoles mentres sinala e castiga a quen denuncia e apoia á denunciante”.
