EFE | A asociación que agrupa aos tecores galegos, Ategal, emitiu un comunicado no que cualifica como “absurda, incoherente e irresponsable” a decisión “política” de prohibir a caza do lobo, porque “pode poñer en perigo aos gandeiros e, por riba a todo o mundo rural”.
Desde o seu punto de vista, trátase dunha “puñalada por detrás” por parte daqueles que “en campañas electorais enchen a boca pregoando o seu amor polo rural”, ao que logo “desangran e condenan, unha e outra vez, con decisións como esta”.
“Desde Ategal lamentamos que o Goberno abandone o mundo rural ao incluír ao lobo na listaxe de Especies Silvestres de Protección Especial, o que supón que xa non se poderá xestionar esta especie desde a actividade cinexética en toda España”, aclara.
Nese sentido, os tecores agrupados en Ategal afirman “compartir o desánimo das comunidades autónomas que contan con poboacións estables de lobo e que, grazas á súa xestión, conseguiron conservalas e melloralas”. Foron esas comunidades, lembra este colectivo, as que “se opuxeron a esta restrición, ilóxica de xeito evidente”.
Ategal opina nunha nota que “a comisión estatal de Patrimonio Natural ditou unha sentenza de morte para o rural galego e quen sabe se non o fará tamén para as poboacións de lobo”. “Ninguén está interesado na extinción do lobo, todo o contrario. É un motivo de orgullo contemplar a boa evolución das súas poboacións”, engade, polo que lles pide a quen toma estas “decisións” que “deixen de lado ideoloxías políticas e exerzan o seu labor con rigor e a máxima das responsabilidades”.
Por iso, reclama dos grupos políticos galegos que “poñan toda a carne no asador para evitar o desastre ambiental que supoñería unha poboación de lobos descontrolada por falta de xestión”.
