As Unidades de Coidados Intensivos (UCI) de Lugo volven quedar sen ningún paciente de coronavirus logo de varias semanas. O Sergas informa de 17 hospitalizacións relacionadas coa Covid-19 na área lucense, pero todas elas en planta (catro no HULA, dez no Hospital da Mariña e tres no de Monforte).
Con todo, a este dato favorable hai que contrapoñer outro que non o é tanto: os novos casos confirmados nas últimas 24 horas case duplican os detectados o día previo. Son, en total, 57 novos diagnósticos (28 máis ca os notificados unha xornada antes).
Segundo o informe remitido pola Consellería de Sanidade, tamén ascenden os casos activos na área sanitaria de Lugo, que xa se sitúan nos 507 (24 máis).
Por outra banda, dende o inicio da pandemia curáronse 6.629 persoas, faleceron 147 e realizáronse 127.325 PCR.
