EFE | A Deputación de Lugo procedeu á apertura oficial da residencia de maiores O Castro (Castroverde), o quinto xeriátrico construído e equipado pola institución provincial, que dispón de 30 prazas asistenciais e creará outros tantos postos de traballo no municipio.

O presidente da Deputación, José Tomé, acompañado por outros membros do goberno provincial e do alcalde de Castroverde, José María Arias, así como por persoal técnico da institución provincial, participou hoxe na comisión técnica do centro de maiores que formalizou a apertura oficial destas instalacións.

Entre esta semana e a que vén, un total de 18 persoas, seleccionadas na primeira fase, realizarán o preingreso no centro para coñecer as instalacións e o persoal antes de quedar de forma definitiva. Tamén poderán ir levando os seus obxectos persoais.

A Deputación recibiu case 50 solicitudes de ingreso, polo que nos próximos días celebraranse novas comisións de valoración para continuar co proceso de selección e admisión de solicitudes.

CARACTERÍSTICAS

A nova residencia conta cunha superficie útil de 1.800 metros cadrados -incluídas as zonas exteriores- e o edificio divídese en dúas plantas, de 773 metros cadrados cada unha.

Na planta baixa sitúanse os servizos de enfermería, primeiros auxilios, cociña, lavandería, recepción, comedor e salas de lectura e televisión, mentres que no segundo piso hai 24 habitacións, 16 delas individuais e oito dobres.

“Fomos capaces de cumprir o noso compromiso e abrir antes de final de ano e con todas as garantías esta residencia tan demandada e esperada en Castroverde”, dixo Tomé sobre un centro que xa foi inaugurado no ano 2015.

Co de Castroverde, a Deputación de Lugo suma cinco centros públicos de atención a persoas maiores, dado que a este último hai que sumar os de Trabada, Ribadeo, Pol e A Fonsagrada, con capacidade para atender a máis de 200 persoas. O goberno provincial confía en abrir este ano tamén as residencias de Pedrafita do Cebreiro, Meira e Navia de Suarna.