A presidenta da asociación contra a violencia machista ‘Si hai saída’, Marta Rodríguez Engroba, alertou este luns do risco que trae a época do Nadal, ao tratarse dun período no que “diminúen” en Lugo os servizos de atención
Rodríguez Engroba destacou que na súa organización incrementouse un 40% o número de consultas sobre malos tratos, de forma que nestes meses de pandemia atenderon cincuenta vítimas.
Estas consultas multiplicáronse nas últimas semanas, de cara á ponte da Constitución e ao período do Nadal. “Son datas que todos os anos se presetan a máis problemas: intercambio de menores, reunións familiares e ademais os servizos minimízanse tanto a nivel policial como administrativo porque lamentablemente en Lugo opérase moito en horario de funcionariado”, lamentou.
A activista contra a violencia de xénero pon o acento en que “a preocupación é enorme” e as restricións ás reunións de familiares van “traer friccións, a agresividade aumenta”, deduce. “Si que notamos que imos a unha situación de confinamento co maltratador e que se produce un incremento de consultas”, significou.
‘Si Hai Saída’ constata un “incremento do corenta por cento” nas consultas onde aínda hai “moitas mulleres indecisas en canto á decisión a tomar e que están a tentar preparar o camiño”. “Non todas as mulleres teñen o mesmo estado do problema, e outras xa levan moito tempo connosco”, concluíu Marta Rodríguez Enrgoba.