O ciclo de Faladoiros Feministas —agora Ciberfaladoiros— continúa este venres 4 de decembro en Lugo coa charla online da economista e activista en igualdade Carmen Castro, que abordará as estratexias feministas para repensar a economía.
A Deputación e o Foro Feminista Maruxa Mallo organizan un novo encontro de debate, aberto á participación da cidadanía e que se poderá seguir a través da canle de Youtube de Nomenklaturas Gestión Cultural ás 19:30 horas.
Carmen Castro é especialista en políticas europeas de igualdade, estratexia de mainstreaming de xénero e empoderamento das mulleres na administración pública. Licenciada en Economía pola USC, como investigadora foise especializando na consultoría e asesoramento de políticas públicas de xénero. É autora de varias publicacións e guías prácticas, e promotora de Sin Género de Dudas, a primeira bitácora feminista con perspectiva de xénero de lingua hispana.
Galardoada con diferentes recoñecementos, en 2019 recibiu o premio ‘Les Corts de les Dones’, outorgado polas Cortes Valencianas, pola súa traxectoria profesional e persoal na defensa da igualdade e os dereitos das mulleres. Entre os anos 1992 e 1996 foi presidenta da Asociación Mulleres Xoves de Galicia.
OUTRAS CHARLAS
O ciclo de Ciberfaladoiros Feministas rematará o venres 11 de decembro coa charla de Sonia Ramos. No marco destes coloquios, a semana pasada a xornalista Mabel Lozano presentou por primeira vez en Galicia o seu novo libro PornoXplotación de denuncia da trata humana.
