A xuíza Pilar de Lara está disposta a chegar ao Constitucional e ao Tribunal Europeo de Dereitos Humanos en contra do fallo do Consello Xeral do Poder Xudicial (CXPX) que a castigou con sete meses e un día, con perda de destino, por dilacións indebidas nos numerosos procesos xudiciais que levou cando era titular de Xulgado de Instrución Número 1 de Lugo.
O avogado da xuíza, Agustín Azparren, concretou que “agora” estase na última “fase” do recurso que se presentou no seu día ante o Tribunal Supremo contra a sanción. “Xa fixemos as conclusións todas as partes que están no procedemento e por tanto xa só quedaría que ditase sentencia o Tribunal Supremo. É a parte final do procedemento, poderíannos dar a razón e entón complicaríase bastante a cousa porque [Pilar de Lara] tería que reincorporarse (ao xulgado de Lugo)”, sentenciou.
ATA ESGOTAR AS POSIBILIDADES
No Supremo “acabaríase a vía ordinaria”, pero “no caso de que non se estimase o recurso aínda quedarían dúas vías: un recurso de amparo ante o Tribunal Constitucional e, se non hai máis remedio, o Tribunal Europeo de Dereitos Humanos”.
O avogado de Pilar de Lara refúxiase no argumento de que “un dos aspectos nos que isto se pode atacar de cara ao Tribunal Europeo de Dereitos Humanos é precisamente insitindo en que un xuíz que estaba a investigar casos de corrupción “ao final apartouna do xulgado”. Lembra, neste sentido, que o grupo GRECO do Consello de Europa (grupo de países contra a corrupción) recomendou a España que se tomaran medidas respecto da independencia xudicial, especialmente en casos de corrupción.
DESTINO: PONFERRADA
Nos próximos días Pilar de Lara incorporarase a un xulgado de Ponferrada. De feito, Azparren subliñou que “non” vai tardar “moito” en empezar a exercer alí.
“Está executada a sanción pero iso non quere dicir que, en caso de que se estimase o recurso ou se anulase algún dos recursos que quedarían tería que dar marcha atrás á execución da sanción, devolución do importe económico (os sete meses e un día suspendida de emprego e soldo) e reintegrala no xulgado de Lugo”, resolveu.