A ex titular do Xulgado de Instrución Número 1 de Lugo Pilar de Lara, que instruíu macrocausas como a ‘Pokémon’, xa cumpriu a sanción que lle impuxo o Consello Xeral do Poder Xudicial (CGPJ) de sete meses e un día, por dilacións indebidas nos procesos que levaba, e agora volverá concursar e optar a algunha das máis de cen prazas que se habilitan para este concurso.
A propia xuíza confirmou que o castigo “xa venceu o 2 de setembro, xa se fixo efectivo o reingreso ao servizo activo que aprobou a Comisión Permanente (do Consello Xeral do Poder Xudicial) de sete meses e un día de suspensión de emprego e soldo”.
Agora tócalle cumprir coa “segunda parte, que é a perda de destino en Lugo (tras 12 anos)”. “E obríganme ao que é a perda de destino e a concursar a todas as prazas que quedan dispoñibles”, dixo. Pilar de Lara concretou que “xa saíu publicado o concurso de maxistrados o pasado 8 de setembro, e xa pedía destino e agora a ver que pasa”. “Saíron bastantes prazas, non lembro pero sobre 104 ou 105 e eu tiven que pedir todas. Tardei bastante tempo en cubrir o formulario”, confesou.
En canto a “destinos prioritarios”, asume a xuíza que é “consciente” que non ten “ningunha probabilidade” de pedir en Galicia, con “o cal está todo o abanico aberto”. “Onde máis posibilidades teño de conseguir destino é naquelas comunidades autónomas que non adoitan ser desexadas polos compañeiros, é dicir; Cataluña, Canarias ou algúns xulgados de Madrid. Son ese tipo de prazas que adoitan quedar vacantes”, constatou.
Neste sete meses a xuíza, que levou operacións como a ‘Carioca’ sobre redes de prostitución, a ‘Pokemon’ ou o ‘Garañón’ sobre corrupción política, recoñeceu que “os dous primeiros meses (de sanción) foron máis duros porque te tes que facer á idea”. “A min gústame traballar e entón de súpeto pasas dunha actividade bastante extrema e no meu caso os últimos meses de traballo foron dun gran esforzo e de súpeto estás parada”, sinalou.
Pilar de Lara destacou que todo este tempo para ela foi “bastante produtivo, á marxe de toda a situación de Covid”. “Acabei realizando moitísimos cursos; algúns organizados polo Consello Xeral do Poder Xudicial, algúns cursos do Consello de Europa e logo cursos noutros países, todos vía en liña”, comentou.
“Tratei de formarme e de aproveitar o tempo; facer actividades de hobby como tocar a guitarra, formarme en idiomas, sobre todo francés e inglés que os tiña bastante esquecidos. Aproveitei o tempo todo o que puiden”, concluíu a xuíza que en abril abandonou o Xulgado de Instrución Número 1 de Lugo.
