O Alcalde da Pontenova, Darío Campos Conde, criticou este luns a “nula” atención médica que padecen os veciños e veciñas da Pontenova como consecuencia da “política letal do PP no noso Concello”. Segundo apunta o consistorio, en mans do PSdG, “dende fai mais dunha semana só hai un medico para atender aos pacientes da vila. Primeiro suprimiron unha praza das tres que había, e agora un hai unha baixa e non a cobren”.
O alcalde critica de xeito particular que a reducción do cadro de persoal teña lugar no verán, momento no que se produce un incremento da poboación como consecuencia do turismo e xusto cando “estamos atravesando unha pandemia tan grave como a do COVID”, destaca. Neste aspecto, o rexidor alude directament eó goberno de Feijóo para esixirlle “uns servizos públicos de calidade” como, apunta, “merecemos os veciños do rural, máxime nun municipio como a Pontenova cunha poboación altamente envellecida, onde
os pacientes xa contan cunhas patoloxías que merecen mais atención e máis
tempo de consulta”.
Por iso, apunta, “non podemos consentir que nos supriman servizos. Esiximos ao PP que cubra a praza médica da Pontenova para que as veciñas e veciños poidan ser atendidos con tódalas garantías médicas. Un médico non chega para atender aos 2.300 veciños”.
