Un dos pacientes que permanecían na UCI do Hospital Público da Mariña tras ingresar por coronavirus faleceu no centro hospitalario de Burela, segundo confirmaron fontes do Servizo Galego de Saúde (Sergas). Esta persoa dera negativo no test do virus tras varias semanas ingresado.
A súa morte, porén, non se contabiliza entre os falecementos relacionados coa pandemia, ao considerarse superada a enfermidade. Desta maneira, a provincia mantense con 27 persoas finadas pola COVID-19.
A EVOLUCIÓN, EN DATOS
En canto aos datos para a provincia, a Consellería de Sanidade rexistra este mércores 13 de maio un total de 124 casos activos por coronavirus na área sanitaria de Lugo, nove menos ca onte.
Catro persoas permanecen na Unidade de Coidados Intensivos do HULA e unha quinta está hospitalizada en planta. Os 119 restantes permanecen baixo atención hospitalaria a domicilio.
Continúan medrando as altas, con 757 persoas curadas de coronavirus na provincia, segundo os datos oficiais de Sanidade.
GALICIA
Na comunidade galega tamén baixan os positivos (-143), pero continúan por riba dos 2.000. Os pacientes curados ascenden a 7.996 e os falecementos sitúanse nos 597.
