A Dirección Xeral de Saúde Pública da Consellería de Sanidade vén de actualizar os datos dos positivos por coronavirus. Na comunidade galega, esta cifra xa ascende a 285, dos cales 26 pertencen a Lugo. Así, a provincia presenta un incremento de dez diagnósticos respecto á xornada de onte.
Na área da Coruña rexístranse 84 casos; na de Ourense, 32; na de Pontevedra, 37; na de Vigo, 49; na de Santiago, 50; e na de Ferrol, 7.
Do total de pacientes positivos, nove deles permanecen en UCI, 52 están en unidades de hospitalización e 224 no domicilio. Polo de agora, en Galicia rexistráronse 4 altas de pacientes e 3 falecementos. Ademais, Sanidade tamén informa de que xa se realizaron 2.099 probas PCR.
RECOMENDACIÓNS
A Consellería de Sanidade pide á cidadanía que chame ao 061 só para emerxencias ou en casos graves. Lembra que segue activo o número gratuíto 900 400 116 para consultar dúbidas ou síntomas leves sobre o coronavirus. Así mesmo, o Sergas habilitou unha páxina web específica con información sobre a enfermidade e puxo en marcha un autotest para contrastar síntomas.
