A Dirección Xeral de Saúde Pública da Consellería de Sanidade informou de que, na última actualización deste luns, o número de casos de coronavirus en Galicia ascende a 239. Deles, 16 son da provincia de Lugo, onde onte aínda se rexistraban nove positivos.
Na área da Coruña contabilízanse 80 casos, 28 na de Ourense, 26 na de Pontevedra, 46 en Vigo, 37 en Santiago e seis en Ferrol.
Do total, 181 permanecen no domicilio, mentres que nove están a ser atendidos na UCI e 49 están en unidades de hospitalización. Así mesmo, Galicia xa rexistrou as catro primeiras altas de pacientes, pero tamén os tres primeiros falecementos: o último, esta mañá na Coruña, foi un home de 45 anos que sufría patoloxías previas.
O Ministerio de Sanidade, pola súa parte, manexa unhas cifras un pouco superiores e sitúa o número de contaxiados en Galicia. nos 245.