EFE.- O secretario comarcal da CIG en Lugo, Antonio Niño, cualificou como un “parche” o reforzo aprobado polo Consello Xeral do Poder Xudicial ( CGPJ) para facer fronte á acumulación de casos que veñen padecendo os xulgados do Social na capital lucense. Iso non solucionará “o problema” estrutural, din.
En declaracións a EFE, Antonio Niño lembrou que o Consello Xeral do Poder Xudicial simplemente se limita “a prorrogar” a presenza dun xuíz de reforzo e a liberar en comisión de servizos a outro para os casos que fan referencia a indemnizacións por despedimento, cando son “precisamente eses os que menos atraso acumulan”.
“Prolóngase a situación que xa había”, lamentou, e que se demostrou ineficaz para liquidar o problema “de embotellamento” que veñen padecendo desde hai anos os xulgados do Social de Lugo, “que están a realizar sinalizacións para o ano 2022”.
“Isto é un parche”, dixo Antonio Niño, quen insistiu en demandar a creación de “un novo Xulgado do Social en Lugo”, unha cuarta unidade que xa contaba con luz verde por parte da comisión mixta formada pola Xunta e o Tribunal Superior de Xustiza de Galicia. EFE