O avogado de Xosé López Orozco, Gregorio Arroyo, anunciou que volverán pedir o sobresemento da causa que se segue contra o exrexedor pola urbanización do Garañón, un caso no que tamén está investigado o que fora secretario xeral do PSdeG, José Ramón Gómez Besteiro.
O letrado destacou que se insistirá neste sobresemento “en base aos propios argumentos do auto do arquivo que recentemente acordou a xuíza Pilar de Lara”. En concreto, o Xulgado número 1 de Lugo decretou o pasado venres o arquivo provisional da causa aberta tras a denuncia do sindicato CSIF contra a alcaldesa, Lara Méndez, e o seu predecesor Orozco polo nomeamento do posto de letrado asesor do concello de Lugo.
Arroyo asegurou que neste asunto a xuíza utilizou argumentos nos que xa insistía a defensa e que pasan por que a vía administrativa ou a vía contenciosa (non penal) é a adecuada para estes procedementos” de forma que non se poidan “penalizar condutas propiamente administrativas”.
Neste sentido, o avogado considera que “se hai algunha irregularidade, a vía contenciosa é a adecuada” e, por conseguinte, asegura que iso tamén sería “o lóxico neste caso, en base a estes mesmos argumentos nese xiro na argumentación xurídica por parte da instrutora”. “Por iso imos insistir no sobresemento”, incide o avogado madrileño.
Outra investigación que persegue a Orozco ten que ver cunha peza da Pokémon, a do guindastre, outro caso que confía en que se lle arquive a imputación. “As demais están arquivadas”, constata Arroyo. Tras o arquivo pola denuncia da CSIF, Orozco acumula xa sete desimputacións, que poderían sumar nove se finalmente se aceptan os seus argumentos para o arquivo do Garañón e para a peza da Pokémon.