Un total de 3.040 estranxeiros radicados en Galicia adquiriron a nacionalidade española no ano 2021, o que supón un incremento do 35,8% respecto dos 2.238 de 2020, segundo os datos que publica o Instituto Nacional de Estatística (INE) este venres.
O último ano que se superou a cifra de 3.000 na serie histórica produciuse en 2015 (3.948). Dos máis de 3.000 estranxeiros que conseguiron a nacionalidade en Galicia, 1.224 eran homes e 1.816, mulleres. En canto ao modo de adquisición, 2.640 persoas fixérono por residencia e 400 por outras vías.
En comparación coa poboación estranxeira xa residente ao comezo do ano 2021 en Galicia, os que conseguiron nacionalidade en 2021 representan o 2,5% do total, lixeiramente inferior ao 2,7% da media española.
Por país de nacemento, a maior cifra provén de Venezuela (394), República Dominicana (316), Brasil (259), Cuba (232), Marrocos (227) e Colombia (226). Por provincias, 1.203 residían na Coruña, seguida de Pontevedra (889), Lugo (516) e Ourense (432), segundo os datos do INE.
