A carballeira de Gomeán, no Corgo, acollerá o vindeiro domingo 9 de agosto unha nova edición da Feira de Ano de Gomeán, organizada pola Asociación de Veciños “O Salgueiriño”.
A cita presentouse no xardín do Pazo de San Marcos, coa participación de representantes da asociación corguesa e do vicepresidente da Deputación Efrén Castro que puxo en valor “o traballo da asociación para revitalizar e reivindicar a tradición rural e gandeira do Corgo coa celebración desta feira, cun programa moi variado que implica a ganderías e profesionais do concello e da comarca”.
A xornada celébrase no campo da feira de Gomeán, que revivirá as feiras de antano,cunha mostra de razas autóctonas, da man de Boaga, e outra de maquinaria agrícola clásica, con vehículos de Muvicla, así como demostracións de oficios artesáns e actividades relacionadas coa vida tradicional no rural e a agrogandería, que animarán o recinto durante toda a xornada. Así, entre outras actividades, as persoas que se acheguen a Gomeán poderán seguir de primeira man demostracións de cetrería, manexo de porco celta e agility.
O programa complétase coas actuacións do grupo de música tradicional corgués Legua Dereita e de Cé Orquestra Pastasma, cun espectáculo para público familiar, e coa oferta gastronómica, cun menú degustación, con empanada e porco celta ao espeto, con produto da gandería local Rego de Manzadán.
A feira conta un ano máis co apoio da Vicepresidencia da Deputación de Lugo, que achega 5.000 euros para a organización da feira.
