O PP de Vilalba elixiu este sábado por aclamación á deputada autonónica e, ata agora, presidenta da xestora, Sandra Vázquez, como nova líder da formación nun congreso no que se renovou a xunta directiva local.
Segundo informa nun comunicado, o comité executivo, composto por 10 mulleres e cinco homes, integra “caras novas de xente nova e persoas con experiencia en gobernos anteriores”, que contarán co apoio de 32 vogais en representación do conxunto do termo municipal. A proposta da presidenta a José María García Leira uniranse na Presidencia de Honra do partido os tamén exalcaldes Agustín Baamonde e Gerardo Criado.
“O legado do noso presidente fundador, Manuel Fraga, merece que desde hoxe se empece a construír un proxecto gañador que alcance o goberno desde a unidade, xenerosidade e do que sexan centro os vilalbeses”, proclamou a presidenta provincial do partido, Elena Candia. Vázquez, pola súa banda, comprometeu “sumar” e “traballar” para fortalecer o partido.
