O PP de Lugo mostrouse “preocupado” pola “parálise” demostrada por parte do Goberno provincial dirixido por José Tomé, ao que ven “incapaz de xestionar os fondos europeos e liderar a reactivación económica da provincia”.
Así llo fixo saber o grupo provincial á presidenta do partido en Lugo, e deputada autonómica, Elena Candia, coa que se reuniron “no marco dos seus frecuentes e periódicos encontros para avaliar a situación política en Lugo e analizar as mellores iniciativas para a provincia”, tal e como sinalaron nun comunicado. Candia expresou o “total respaldo” do partido aos deputados provinciais e puxo en valor “a unidade e firme determinación da organización de recuperar o goberno da Deputación”.
Pola súa banda, o portavoz provincial dos populares, Javier Castiñeira, explicou que o PP fai “todo o posible” por participar na saída da crise. “Así o fixo no momento máis complicado da crise sanitaria, mentres o goberno da Deputación chegaba tarde a practicamente todo. Non estableceu axudas para a recuperación económica do tecido produtivo lucense, algo que desde o partido popular tentamos reiteradamente”, sinalou.
“Non hai capacidade para xestionar os fondos Next Generation de reactivación e resiliencia. A Deputación, tamén nisto, vai moi por detrás do resto de administracións, tanto da autonómica, que leva moitos meses traballando eficazmente, como doutras deputacións que teñen avanzados diferentes plans”, destacou Castiñeira, que remarcou que a Deputación debe “liderar, algo que non ocorre a día de hoxe”.
